Renault enpresako auto elektrikoen saileko presidenteorde Gilles Normand-ek urte hasieran emandako elkarrizketa batean esan zuen auto elektrikoen salmentak %31 hazi zirela Europan 2018an, “European Alternative Fuels Observatory” behatokiak emandako datuen arabera. Hala ere, Normand-ek adierazi zuen hainbat gorabehera izan dituztela baterien hornitzaileekin.

LG Chem enpresak lantegi bat ireki zuen Polonian 2018aren hasieran 100.000 ibilgailu elektriko ekoizteko gaitasunarekin. Kopuru hori 2015eko hasierako planean (lantegiaren irekiera iragarri zenean) aurreikusitakoaren bikoitza izan zen. Baina kontua ez da hor bukatzen, LG Chem -ek berriki iragarri baitu 500 milioi gehiago inbertituko dituela produkzioa handitzeko, urtean 300.000 ibilgailu egiteraino. Eta hazkunde hori lortu nahi dute 2021erako.

Momentuz, Txinak dauka horrelako bateriak produzitzeko gaitasun handiena. Panasonic, LG eta Samsung dira merkatuko enpresa garrantzitsuenak. Nissan edo Tesla bezalako fabrikatzaileek ere lantegi propioak eraiki dituzte, eta azken horrek, adibidez, 2016 osoan baino gehiago ekoitzi zuen 2018ko hiruhileko bakar batean.

Bloomberg aholkularitzako analista den Goldie Scot-ek gaur egungo egoerari buruzko kopuru batzuk eman ditu. 2015ean 79 modelo bageneuzkan, gaur egun 200 dauzkagu eta 2022rako 300 espero dira.

Horrekin batera, hazi egingo da orobat Litio-Ioizko bateriak (elektrodoak, elektrolitoak) fabrikatzeko behar diren osagaien eskaera; 2018an 700.000 tona metrikoko eskaera bazegoen 10 milioi tona metrikoraino iritsiko da 2030ean.

xataka.com