Baina mota askotako ispiluak daude; etxeko bainugelan ispilu hau izango bazenu, esango lizuke ez zenituela hartu behar bezperako azken bi gin-tonicak, eta txorizoa ere soberan zegoela, horixe salatuko dute zure gorputzeko alkohol eta kolesterol indizeek eta lipido kopuruak. Ispilua lagun mozorrotutako arerioa da, ?edo alderantziz.
Laster, ispilu hitza erabiliko dugu beste zerbaiti deitzeko. Eta horretarako, adimendun hitza erantsi beharko diogu. Batzuk esango dute ispilu adimenduna oximorona dela: ispilua ergela dela, guk erakusten dioguna bakarrik islatzen duelako. Baina bukatu da hori, barruraino aztertuko gaituelako.
Semeoticons izeneko ikerlari taldea (Europak finantzatua eta Sara Colantonio italiarrak zuzendua) urtetan aritu da lanean Pisan ispilu adimenduna sortzeko. Ispilu itxurako azalera bat da, non kamera eta sentsore mordoa baitaude ezkutatuta gure odol-fluxua, oxigenazioa, azalpeko gantza, azalaren egoera? eta beste hainbat irizpide neurtzeko. Datu horiek guztiek norbere egoera orokorrari buruzko informazioa emango dute, abisuak pasako dituzte bihotz-hodietako arriskuren bat badago, eta gimnasia egiteko aginduko digute. Zure gorputzaren egoera ?beti? kezkagarriari buruz informatzeaz gain, orobat esango dizu zer egin behar zenukeen hobetzeko.

elpais.com