Ogibidez ingurumen ingeniaria den Tapiak Efe agentziari azaldu dio beti zaindu nahi izan duela ingurumena, batik bat, birziklapenaren bitartez: “jendea konbentzitu nahi nuen orri baten bi alderdiak erabil zitzan edo birzikla zezan, horrela gure bioaniztasuna, hots, zuhaitzak zaintzeko”. Bide horri jarraiki sortu du Bohemia Papel, helburu nagusitzat “kontserbazioa” duen proiektu bat, ziur baitago “pertsona bakoitzak hondar-ale txiki bat jar dezakeela” helburu hori iristeko.

Orriak egiteko prozesua abiarazteko, erabiltzen ez diren orriak biltzen dira (orri zuriak, koadernoetakoak, kartulinak, e.a.) bulegoetan edo ikastetxeetan, horiek baitira hornitzaile garrantzitsuenak. “Ezin ditugu erabili faxaren papera, paper karbonikoa, paper plastifikatuak edo aldizkarietakoak (couché motakoak eta beste batzuk) eta ezta egunkaririk ere” argitu du. Tapiak erakutsi duenez, paperak prozesu luze bat igarotzen du orea egiteko (xehatu, zopatu eta likidotu egiten da), hau da, orri artisau berriak egiteko oinarria izango den materiala sortzeko. Tapiak dioenez, paper biodegradagarri hauen nobedade nagusia da ore horri denetarik gehitzen diotela (haziak, zuntz begetalak, azalak, bio-hondakinak, platano hostoak, totora –Titicaca lakuaren inguruko ihi bat- edo lore lehorrak), “paperari testurak eta kolorea emateko”. Gainera, hazidun papera “lurrera itzul daiteke”, lorontzi batean jarriz gero “loreak eman ditzakeelako” edo belarrak (kamamila adibidez) edo bertakoak diren beste landare batzuk ere bai, esaterako huacataya eta quirquiña, “erabiltzen ari garenak, alegia”.

deia.eus