Bizkaiko hamar enpresatik seik ekimen berritzaileak garatu dituzte 2018an

Antolakundeen %62,1 gustura daude lortutako helburuekin eta %77,6k fakturazio handiagoa dute.

BERRIKUNTZA-JARDUERA

Bizkaiko enpresen %57,1ek adierazi dute berrikuntza-jardueraren bat egin dutela 2018an. Datu horien arabera eta aurreko urtearekin konparatuta, dezelerazio bat gertatu da, enpresa berritzaileen tasa portzentajezko 3,6 puntu jaitsi delako.

BIZKAIKO BERRIKUNTZAREN INDIZEA

Inkesta honen oinarri den eta enpresetako berrikuntza-jardueraren sistematizazio-gradua neurtzen duen Bizkaiko Berrikuntzaren Indizearen arabera, enpresen %34,1ek berrikuntza-maila handia edo oso handia dute.

LORTUTAKO HELBURUAK

Norabidea 2019 txostenean bada beste ondorio garrantzitsu bat, antolakundeen %62,1ek uste baitute berritzeko hartutako erabakia arrakastatsua izan dela. Hona hemen lortu dituzten emaitzak: kalitate hobea (%81,1), fakturazio handiagoa (%77,6), eta bezeroen premiei arinago erantzuteko gaitasuna (%74,9).

BERRIKUNTZA MOTAK

Inplementatutako berrikuntzen tipologiari dagokionez, berrikuntza teknologikoen artean aipatzekoak dira: produkzio prozesuen hobekuntza (%28,4), merkaturako produktu berriak (%28,4) eta produkzioko teknologia berriak (%28,2). Eta berrikuntza ez-teknologikoen artean (marketinekoak edo antolakuntzakoak) hauek nabarmentzen dira: kudeaketa praktika berriak edo hobetuak (%10,3), antolakuntzako aldaketak (%7,8), eta sustapen eta komunikazio era berriak (%7,1).

ENPRESA BERRITZAILEEN EZAUGARRIAK

Azterlanak Bizkaiko berrikuntza-jarduera sistematizatuaren hainbat aldagai identifikatzen ditu. Honelako enpresek garatzen dituzte berrikuntza-jarduerak:

• enpresa sortu berriek eta beren negozio-zikloa hastapenetan dutenek,
• 50 eta 100 langile bitartean dauzkatenek,
• nagusiki zerbitzuen sektorekoek,
• enpresa esportatzaileek, fakturazio-portzentajea kontuan hartu gabe.
• beren jarduerak garatzeko laguntza publikoak jasotzen dituztenek,
• berrikuntzak gauzatzeko beste konpainia edo erakunde batzuekin lan egiten dutenek,
• I+G+B-ko langileak dituztenek,
• inplementatutako ekintzekin beren igurikapenak ase dituztenek.

LANKIDETZA

Bizkaiko enpresen %40,9 lankidetzan aritu dira azken urtean. Horrelako lankidetza-akordioak dauzkaten enpresen tasa berdin mantendu da azken hiru ekitaldietan, beraz, esan genezake funtzionatzeko modu hori ohikoa dela enpresen artean.

Berritzaile eta ez-berritzaile bezala sailkatutako enpresen desberdintasun handienetako bat da ez-berritzaleek berritzaileek baino askoz gutxiago parte hartzen dutela eragile teknologiekiko lankidetzetan. Alde hori nabarmena da baita ere Unibertsitateekiko lankidetzan.

Hauek dira lankidetzaren helburu garrantzitsuenak:

• Produktu edo zerbitzu berriak edo hobetuak diseinatu eta garatzea (%36,4).
• Produktu edo zerbitzu berrien kontzeptuak eta ideiak sortzea (%30,5).
• Eta merkatu berriak garatzea (%29,2).

Oro har, enpresek emandako datuek erakusten dute lankidetzaren helburuak gainditu edo ase direla. Enpresen %4,6k bakarrik esan dute lankidetzak ez diela lagundu beren helburuak lortzen.

ENPRESA EZ-BERRITZAILEAK

Beste muturrean daude 2018an inolako berrikuntza-jarduerarik egin ez duten enpresak, %42,9 alegia.

Enpresa talde horretako konpainia gehienek berriro adierazi dute beren ustez ez dela beharrezkoa ekimen berritzaileak egitea, batzuek ez dutelako premiarik ikusten, beste batzuek pentsatzen dutelako ez dagoela ondasun eta zerbitzu berritzaileen eskaerarik, eta besteek, aldiz, berrikuntzaren kostuagatik.

Berritzen ez duten enpresen %64,8k diote nolabaiteko laguntzak (dirulaguntzak, orientazioa, zerbitzu teknologikoak, e.a.) beharko lituzketela egoera hori aldatzeko.