Azterlana 2025eko apirilean argitaratu zen, eta, bertan ohartarazten denez, etorkizunean eraldaketa “sakonak” bezain “iraultzaileak” gertatuko dira pentsatzeko, jarduteko eta harremanak ezartzeko dugun moduan. Adituek aukerak eta arriskuak egongo direla aitortu duten arren, bat datoz aldaketa handi-handia izango dela eta oso kontuan hartu beharko dela esatean.

Hain zuzen ere, inkestatutakoen %61en aurreikuspenen arabera, AAko sistema ugari ezartzen direnean, aldaketa adierazgarri edo disruptiboak gertatuko dira gizakientzat. %8ren ustez baino ez, eragin hori txikia edo hutsaren hurrengo izango da. Ikuspegi partekatu horrekin batera, honako ohartarazpen argi hau ere egin da: AAren ondorioak ez dira onak edo txarrak bakarrik izango, bien arteko nahasketa konplexua izango dira-eta.

Inkesta hori 2024ko abendutik 2025eko otsailera egin zen, eta hainbat diziplinatako (teknologia, etika, soziologia, ekonomia eta hezkuntza, besteak beste) eta munduko zenbait eskualdetako (Amerika, Europa eta Asia barne) ahotsek parte hartu zuten bertan. Era berean, 200 inguru parte-hartzailek saiakera sakonak eskaini zituztenez, begirada kualitatibo eta globalaren bidez aberastu zen azterketa.

Besteak beste, adituentzat oso kezkagarria ere bada gizartean bizitzeko eta norbera garatzeko funtsezkoak diren trebetasunak narriatu ahal izatea. Zentroaren datuen arabera, askoren iritziz, ondorioak kaltegarriak izango dira honako arlo hauetan: enpatia, adimen emozional eta soziala, pentsamendu kritikoa, autonomia pertsonala, ongizate mentala, nortasuna, banakako agentzia eta judizio morala.

imaginingthedigitalfuture.org