Ospitaleak “urruneko operazio” bat egin zuen lehenengoz teknologia horrekin Mobile World Congress ekitaldian. Sarritan entzuten dugu “5G konektagarritasunak betirako aldatuko dituela gure bizitzak eta gauzekin erlazionatzeko daukagun modua”. Baina teknologia hori hasierako fasean dago oraindik, 2020aren amaierara arte ez da zabalduko komertzialki eta masiboki, eta orduan baino ez dugu jakingo zertan datzan zehazki.

Orain dela gutxi aurkeztu da lehen adibideetako bat: 5G konektagarritasuna duen ebakuntza-gela bat inauguratu da Bartzelonako Clínic ospitalean. Teknologia horri esker, hainbat kilometrotara dagoen zirujau aditu batek aholkuak eta aginduak eman ahal izango dizkie denbora errealean ebakuntza-gelan dauden doktoreei, egia bihurtuz “urruneko kirurgia”ren ametsa. Ekimen hori otsailaren 27an jarri zen praktikan lehenbizikoz, Mobile World Congress ekitaldian, streaming bidez eginiko operazio batean. Hainbat erakunderen arteko elkarlanari esker sortutako teknologia bat da: Clínic, 5G Barcelona plataforma, Vodafone eta Advances in Surgery Channel enpresa.

Clínic ospitalearen ekimen hori Mobile World Congress ekitaldian egingo diren sei proiektu pilotuetako bat da, zeintzuen helburua baita 5Gren aplikazioak erakustea. Teknologia horrek presentzia handia izan zuen ekitaldiaren iazko edizioan. Aurten espero da fabrikatzaileek sare horretara konektatzeko gai diren lehen sakelakoak aterako dituztela, eta Clínic ospitalearenak bezalako proiektuek erakutsiko dutela zeintzuk diren teknologia horren aplikazioak. Baina, oraingoz, zaila da ulertzea nola funtzionatzen duen zehazki. “Urruneko kirurgia” proiektuaren helburua da zalantza guztiak argitzea.

elpais.com