2024. urteari buruzko edizioan, baieztatu egiten da Euskadiren posizioa sendoa dela digitalizazioaren arloan: aztertutako adierazleen %74 Europako sailkapeneko lehenengo hamar postuetan daude kokatuta; eta haietako hamar, lehenengo bosten artean. Horrez gain, adierazleen %83k hobera egin dute aurreko urtearen aldean, eta %71k bere horretan jarraitzen dute edo gora egin dute EBko estatu kideen aldean.

Euskal enpresek eraldaketa digitalean aurrera egiten jarraitzen dute, nahiz eta indartu beharreko funtsezko arloak dauden. Adierazle guztiak (unikornioekin zerikusia dutenak izan ezik) hazi egin dira, eta gehienek hobera egin dute edo bere posizioari eutsi diote. Edonola ere, aldea argia da ezarritako teknologia-motetan: oinarrizkoak (informazioaren truke elektronikoa edo sare sozialen erabilera, esaterako) oso-oso hedatuta daude, baina oraindik teknologia aurreratuenen ezarpena (datuen analitika, hodeiko konputazioa edo adimen artifiziala, esaterako) ez da %50etik gorakoa.

Oraindik ere, ETE-etako merkataritza elektronikoa Europako batezbestekoaren azpitik dago, azken urtean haien negozio-kopuruak hobera egin badu ere.

Txostenean azaldutako gomendioen artean, teknologia aurreratuen ezarpena bultzatzeko premia nabarmentzen da. Orketrak azpimarratzen duenez, oinarrizko tresnak ondo erabiltzen direla kontuan hartuta, funtsezkoa da enpresei irtenbide sofistikatuagoetarantz (AA, clouda, zibersegurtasuna edo analitika, esaterako) jauzia ematen laguntzea, euskal industriaren nazioarteko lehiakortasunari eusteko.

*DESI, orduz geroztik adierazleen taulatzat hartutakoa, digitalizaziorako prozesuan funtsezkoak diren lau dimentsioen inguruan dago egituratuta: (i) trebetasun digitalak, (ii) azpiegitura digitalak, (iii) enpresen eraldaketa digitala eta (iv) zerbitzu publikoen digitalizazioa.

orkestra.deusto.es