Argitalpenean azpimarratzen diren funtsezko puntuetako bat adimen artifizial sortzaileak (GenAI) funtsezko sektoreen eraldaketan daukan zeregina da; esate baterako, manufaktura-industria, logistika, sektore publikoa eta zerbitzu finantzarioak. GPTri eta AAko antzeko tresnei esker, erakundeak erabakiak arintzen, zerbitzuak pertsonalizatzen eta hornikuntza-kateak hobetzen ari dira. Hori dela eta, eragiketen eraginkortasuna handitu da, eta abantaila lehiakor esanguratsua lortu da.

Testuinguru horretan, lidergo digitalerako gaitasunak inoiz baino garrantzitsuagoak dira. Txostenean bertan nabarmentzen denez, ikuspen teknologikoa eta trebetasun bigunak dituzten zuzendariak prestatu behar dira, talde hibridoak zuzentzeko, antolakuntzaren aldaketa kudeatzeko eta etengabeko berrikuntzaren kultura sustatzeko gai izan daitezen. Langileen etengabeko prestakuntza eta reskillinga funtsezko estrategiak dira, gero eta automatizatuagoa den ekonomian lehiakortasuna bermatu ahal izateko.

Bestetik, aldizkarian bertan, inbertsio jasangarrien eta ingurumenari buruzko araudiaren betearazpenaren gorakada dute hizpide, eta nabarmendu egiten dute ESG printzipioak euren estrategian ezartzen dituzten konpainiek ospea irabazten dutela eta, horrez gain, lehentasuna ere badutela finantzaketa berdea lortzeko orduan. Jasangarritasuna, legezko eskakizun hutsa izan beharrean, berrikuntzarako eta bezeroen fidelizaziorako ardatz moduan sendotu da.

Era berean, agirian bertan, euren gardentasuna, eraginkortasuna eta trazabilitatea hobetzeko asmoz datuetan, zibersegurtasun aurreratuan eta blockchain teknologietan oinarritutako irtenbideak ezarri dituzten enpresen arrakasta-kasuak azaltzen dira. Kasu horiek joera argiaren adierazgarri dira: gaur egun digitalizazioa ez da hautazkoa, XXI. mendeko merkatu europarrean bizirauteko eta aurrera egiteko agindua baizik.

Azkenik, The European Business Review argitalpenean azpimarratzen denez, enpresek teknologia, asmoa eta moldagarritasuna bateratzeko daukaten gaitasunaren araberakoa izango da Europako negozioen etorkizuna. Eraldaketa horren ondorioz sortzen den lidergoa, gainera, berrikuntza teknologikoa ikuspen humanista eta jasangarriaren bidez ezartzeko gai izan beharko da ezinbestean.

europeanbusinessreview.com