Apirilean adimen artifizialari buruzko estrategia bat taxutu zen atzerapen hori gainditzeko, eta orain Estatu kide guztiekin koordinatutako plan bihurtu da. “Modu koordinatuan jardun beharko dugu gure helburua lortzeko: hemendik eta 2020aren amaierara bitartean gutxienez 20.000 milioi euroko inbertsio publiko eta pribatuak egitea, funtsezkoa baita hazteko eta enplegua sortzeko. Adimen artifiziala ez da apeta bat, gure etorkizuna da”, azaldu zuen Andrus Ansip-ek, Merkatu Digital Bakarreko presidenteordeak, agenda honen aurkezpenean.

Estatuek eginiko inbertsioen osagarri gisa, Europako Batzordeak 1.500 milioi euro inbertituko ditu hemendik eta 2020ra, hots, 2014-2017. urteen artean baino %70 gehiago. Gainera, EBk gutxienez 7.000 milioi euro eskaini nahi dizkio arlo honi epe luzeko bere hurrengo aurrekontuan (2021-2027).

Onartu den planaren arabera, Estatu kide guztiek estrategia propio bat eta inbertsio arloko konpromisoak izan beharko dituzte askoz jota 2019aren erdialderako. Gainera, adimen artifizialari buruzko ikerketa eta berrikuntzarako elkarte berri bat sortuko da unibertsitateen eta industriaren arteko lankidetza sustatzeko. Era berean, Batzordeak konpromisoa hartu du funts berri bat sortzeko eta, bide horretatik, laguntza emateko adimen artifizialaren arloko enpresa gorakorrei, arlo horretan diharduten Europako bikaintasun zentroak ere garatu eta konektatuko direlarik.

Planak bere baitan hartzen du, orobat, Europako datu-espazio komunak sortzea. Adibidez, osasun arloko datu-base komun bat egingo da pazienteek emandako eskaner anonimotuekin, adimen artifiziala aplikatu ahal izateko minbiziaren diagnostikoan eta tratamenduan.

expansion.com