Berrikuntza horiek zientziako edo ingeniaritzako aurrerakuntzen adierazgarri dira, baita funtsezko sektoreen egiturazko ustezko aldaketen erakusgarri ere:

• Osasuna: gaixotasunak prebenitu edo lehen sendaezinak ziren gaitzak sendatu ditzaketen aurrerakuntza medikoak.
• AA eta konputazioa: eredu irisgarriagoak eta bilaketa adimendunagoak nola lan egiten dugun eta jakintza nola eskuratzen dugun eraldatzen ari dira.
• Klima eta energia: zenbait irtenbidek isuri globalak murriztea dute helburu; esate baterako, altzairu berdea edo erregai garbiak.
• Mugikortasuna: badirudi robotaxiek hirietan nola mugitzen garen aldatuko dutela.

Urtero, MITeko berri-biltzaileek eta argitaratzaileek aurrerakuntza esanguratsuak edo mugarri handia lortu dituzten teknologia emergenteak bilatzen dituzte.

Zerrenda hori egitean, MITek gure etorkizunean eragin handiena edukiko omen dutenak partekatu nahi ditu. Hain zuzen ere, orain dela 24 urte hasi zen zerrenda hori argitaratzen.

1. Vera C. Rubin Observatory - Txileko behatoki astronomiko berriak inoiz eraiki den kamera digital handiena dauka zeru australa aztertzeko. Astronomiari buruzko datu asko eta asko sortuko dituenez, beste ezezagun kosmiko batzuk argitzen lagunduko digu.
2. AA bidezko bilaketa sortzailea (Generative AI Search) - Bilaketarako motor hauek estekak itzultzen dituzte, eta, horrez gain, testuinguruaren araberako erantzun osoak ere sortzen dituzte AAren bidez. Horiek horrela, online informazioa nola eskuratzen dugun aldatuko da. Hori dela eta, baliteke bilaketarako motor tradizionalak bertan behera uztea eta AA bidezko laguntzaile pertsonalek gora egitea.
3. Hizkuntza-eredu txikiak (Small Language Models) - AAko ereduen bertsio arinagoak, eraginkorragoak eta merkeagoak dira, eta, gailuetan baliabide gutxiagoren bidez erabili daitezkeenez, AAren erabilera praktikoa handitzen da.
4. Ganaduaren metano-isuriak murrizteko irtenbideak - Elikagai-gehigarriek ganaduaren metano-isuriak murrizten dituztenez, eragin adierazgarria dute klima-aldaketaren aurkako borrokan.
5. Robotaxiak - Probak egin ondoren, gidaririk gabeko ibilgailu autonomoak abian daude zenbait hiritan, San Frantziskon, adibidez. Horren ondorioz, hiriko garraioa aldatu da.
6. Hegazkinetarako erregai garbiagoa - Erregai berriak ekoitzi dira industriako hondakinen, atzitutako CO₂-ren edo beste iturri jasangarri batzuen bidez, isuriak murriztu ahal izateko.
7. Azkar ikasten duten robotak (Fast-Learning Robots) - AA sortzaileari esker, robotek badute zeregin berriak azkarrago ikasterik eta ingurune aldagarrietara hobeto egokitzerik.
8. GIBaren prebentziorako iraupen luzeko sendagaiak - Tratamendu honetan, sei hilean behin hartutako injekzioaren bitartez, GIBaren aurkako babes luzea eskaini daiteke. Hori dela eta, urrats handia da osasun publikoaren arloan.
9. Altzairu berdea (Green Steel) - Altzairua hidrogeno berriztagarriaren bidez ekoizten denez, industria-sektore kutsagarrienetakoaren karbono-isuriak murrizten dira erabat.
10. Zelula amen bidezko terapia eraginkorrak - Saiakuntzazko tratamenduak egiten ari dira zelula amen bitartez, eta haien emaitzak itxaropentsuak dira zenbait gaixotasunetan; esate baterako, epilepsia eta 1. motako diabetea.

TECHNOLOGYREVIEW.COM