Europar Batasuneko Adimen Artifizialari buruzko Legea abuztuaren 1ean sartu zen indarrean, eta merkatu global handi batean AAri buruz dauden lehenengo arauketetakoa da. Arriskuan oinarritutako ikuspegiaren bidez pertsonak xede dituen AA fidagarrian EB erreferentea izatea dauka helburu.

Legean bertan, arrisku-mailaren arabera sailkatzen dira AAko sistemak: gutxienekoa, handia edo onartezina. Bertan, gainera, debekatu egiten da onartezintzat hartutako jarduerak garatzea; esate baterako, ezaugarri sentikorren bidezko kategorizazio biometrikoa, eskoletan nahiz lantokietan egindako aitortza emozionala, aurpegiko irudi ugari ateratzeko prozesua edo polizia prediktiboa.

Arrisku handiko sistemek eskakizun zorrotzak bete beharko dituzte, eta gutxieneko arriskua dutenek, ordea, gardentasunari buruzko oinarrizko arauak eta indarrean dauden beste lege batzuk baino ez dituzte bete beharko.

Legea apurka-apurka ezarriko da:

• 6 hilabeteren ondoren, debekuak sartuko dira indarrean.
• 9 hilabeteren ondoren, jardueren inguruko kodeak.
• 12 hilabeteren ondoren, AAren gobernantzari buruzko arau orokorrak.
• 24 hilabeteren ondoren, arrisku handiko sistemetarako arauak.
• 36 hilabeteren ondoren, araututako produktuetan integratutako sistemetarako arauak.

Hori guztia bete ezean, 35 milioi eurorainokoak edo urteko fakturazioaren %7koak diren isunak ezarri ahal izango dira.

Enpresentzat, nolabaiteko premia sortzen da legearen ondorioz. Honako hauexek dira gomendatutako lehenengo urratsak: enpresaren zeregina zein den zehaztea (hornitzailea, ezarlea edo inportatzailea), erabilitako AAko sistemen inbentarioak egitea eta haien arrisku-maila ebaluatzea. Horri esker, ekintzak lehenetsiko dira, eta sistema berriak diseinatzen direnean bete egiten direla bermatuko da. Horrez gain, nabarmendu egiten da beharrezkoa dela goi-zuzendaritza zuzenean inplikatzea eta teknikaren zein legearen arloko esperientzia edukitzea.

Lege horrek estandar globala zehaztea nahi du EBk, DBAOrekin gertatu zen bezala. Bestetik, aldaketa nabaria egingo da, AAren arloko alfabetizazioa sustatu beharko delako langileen eta erabiltzaileen artean. Oraindik ere, estandar tekniko zehatzen inguruko ziurgabetasunak dauden arren, garatzen ari dira, eta funtsezkoak izango dira araudia argi-argi eta errentagarritasunez betetzeko orduan.

IBM.COM