Amazonentzako inkestan adierazten denez, AAk eta automatizazioak balorazio hobea dute Z eta milurteko belaunaldietako gazteen artean. Elementu erantsia ere badago, gainera: hezkuntzako arrakala. Hezkuntza-maila handiagoa daukatenak ez dira hain eszeptikoak tipologia profesional berrien sorrerari dagokionez. Uste dute AAren bidez lanbide berriak sortuko direla (%84,4), baita automatizazioaren bidez ere (%82,5).

Besteak beste, Espainiako Bankuaren ustetan, gaur egun ez dauden lanpostu berriak sortuko dira. “New technologies and jobs in Europe” (2023) azterlanean, lan-merkatuaren bilakaeraren eta teknologia berrien artean (adimen artifiziala (AA) eta softwarea, esaterako) nolako lotunea dagoen ikertu da Europako 16 herrialdetan, 2011tik 2019ra arte. Emaitzen arabera, AA teknologiek eta automatizazioak enplegu-maila garbiak handitzen dituzte herrialde gehienetan.

Lanaren Nazioarteko Erakundeak (LANE, 2023) ohartarazi duenez, arazo nabaria egon daiteke enplegua gizonen eta emakumeen artean banatzeko orduan, emakumeek betetzen dituzten lanpostuen bikoitza baino gehiago automatizazioaren eraginpean egon litezkeelako. Errenta ertaineko eta handiko herrialdeetan, gehienbat emakumeak dira sektore administratiboarekin lotutako lanak garatzen dituztenak. Horri aurre egiteko, ezinbestekoa da etengabe prestatzea. 2030erako, EBk honako hauxe dauka helburu: gutxienez 16-74 urteko bizilagunen %80k oinarrizko gaitasun digitalak edukitzea.

elpais.com