Oro har, Euskadik esportazioen errekorra ezarri zuen 2023an, baina Bizkaiak jaitsiera txiki bat izan zuen 2022koekin alderatuta ( % 6,7koa). Hala ere, oro har, portaera ona izan zuen, eta pandemiaren aurreko datuak gainditzen jarraitzen du; egoera konplexu batean egin zuen, jarduera ekonomikoarekin zerikusirik ez duten arazo geopolitikoek markatuta, inflazioaren itzalpean, euroguneak atzeraldia ukitu eta euskal BPGren dezelerazioaren erdian. Nolanahi ere, Bizkaiak EAEko kanpo-salmenten ia % 40 biltzen du 2023an.

Ateratako datuen artean, honako adierazle hauek nabarmentzen dira:

• Esportazioak: 2023an, Bizkaiak maila teknologiko handiko produktuak esportatu zituen, eta haien balioa 481 milioi eurokoa izan zen. Hori dela eta, gehikuntza %31,4koa izan da 2002ko datuen aldean.
• Inportazioak: maila teknologiko handiko produktuen inportazioak 379 milioi eurokoak izan direnez, aurreko bi urteetako atzerapausoetatik berreskuratu dira. Esportazioetan gertatzen den bezala, maila teknologiko handiko produktuen inportazioak izan dira gehien hazi direnak, %24,8, hain zuzen ere, 2002koen aldean.
• Helmuga: maila teknologiko handiko produktuen esportazioen %34,4k eta %20,0k Erresuma Batua eta AEB dituzte helmuga, hurrenez hurren.
• Hornitzailea: orain arte, Txina maila teknologiko handiko produktuen kanpoko erosketen hornitzaile nagusia izan da. Azken urteotan, ordea, behera egin duenez, horrelako produktuen merkatuaren %9,8 baino ez dauka. Beraz, hirugarren postuan dago, %3,4tik %18,2ra igotzean hazkuntza handia izan duen AEBren atzetik eta Erresuma Batuaren ostean (%12,5).

• Produktuen arabera, zenbaketa orokorrean, maila teknologikoa edozein dela ere, jarduera komertzial handiena dutenak kautxuzko eta plastikozko produktuen fabrikazioarekin, metalezkoak ez diren beste produktu mineral batzuen fabrikazioarekin eta metalurgiarekin (maila teknologiko ertain baxua) lotutakoak dira, esportazio guztien % 25,4 eta inportazio guztien % 14,7 baitira.
• Euskadi osoan, maila teknologiko handiko produktuen esportazioen lurralde-bilakaera %21,7 hazi da 2023an. Inportazioei dagokienez, ordea, hazkuntza %8,14koa izan denez, 2022an baino askoz gutxiago hazi dira, orduan %26,3 igo zirela kontuan hartuta.