IKUSI LABURPENA - IKUSI TXOSTENA

2024ko azterketan, funtsezko ideia hau azaltzen da: oraindik ere, Bizkaiko eta EAEko enpresa eta eragile berritzaileek indar handiko apustua egiten dute, euren berrikuntzak Europan babesteko asmoz.

Badirudi patente europarrak erabilgarriagoak eta sendoagoak direla, haien lurralde-irismenagatik nahiz azterketa teknikoaren kalitateagatik. Hori dela eta, patente nazionalen inguruan egindako eskabideek behera egin dute.

Balantze globalean adierazten denez, ekosistema berritzailea gero eta bideratuago dago Europarantz. Euskal enpresek euren garapenak bilatu behar dituzte merkatu zabal eta lehiakorretan. Horren ondorioz, patente europarren zeregina indartu da haien estrategiaren funtsezko pieza moduan.

Edonola ere, PCTek, diseinu industrialek edo erabilgarritasun-ereduek behera egin dutenez, argi dago berrikuntza-jarduera guztiak erritmo berean aurrera egiten ez duela.

Hurrengo urteetarako erronka jabetza industrialaren ahalmenari oraindik onura ateratzen ez diotenentzako laguntza indartzea izango da. Bertan, hain zuzen ere, enpresa txikiak eta hain teknologikoak ez diren sektoreak ditugu hizpide.

PATENTE NAZIONALAK: JAITSIERA ETENGABEA

Bizkaian, patente nazionalen inguruan egindako eskabideak %19 jaitsi dira aurreko urtearen aldean, 21 aurkeztu direlako. Euskadi osoan, zertxobait ere jaitsi dira, 2026. urtetik bere horretan dirauen joeraren haritik.

Berriro ere, enpresak izan dira patente gehien lortu dituztenak, estatu-mailako eskatzaile nagusien artean EHU bakarrik agertzen bada ere.

Emakidek ere atzera egin dute: Bizkaiak 13 erdietsi ditu; eta EAEk, 29, guztira. Hori dela eta, agerikoa da horrelako babesaren pisu erlatiboa txikiagoa dela nazioartekoagoak diren aukeren aldean.

PATENTE EUROPARRAK: SISTEMA GOGOKOENA

Patente europarrek gora egin dute berriro. Bizkaiak 71 eskabide erregistratu dituenez, hazkuntza leun bezain etengabeari eutsi dio. EAEn, datua are nabariagoa da: 193 eskabide. Beraz, hiru urtez jarraian igo da.

Dinamismo horren ondorioz, Euskadi Estatuko eskualde aktiboenetakoa da Europako berrikuntza babestuan, 2024an eskabide gehien egindako 2. erkidegoa da-eta.

Enpresak protagonistak izan dira erabat, eskabideen %90 baino gehiago aurkeztu dituzte-eta. Eskatzaile handien artean, Siemens Gamesa, Tecnalia edo Autotech Engineering nabarmentzen dira.

NAZIOARTEKO PATENTEAK (PCT): BEHERAKADA NABARIA

Berriro ere Euskadin bertan Bizkaia PCT eskabideen aurkezpenean liderra izan den arren, 2024. urtean behera egin du nabarmen. Bestetik, berbera gertatu da EAE osoan, 70 eskabidetik 47ra jaitsi da-eta.

Oraindik ere, enpresak nagusi diren arren, haien jarduera ere modu nabarian murriztu da. Hiru euskal erakundek baino ez dute lortu Estatuko 50 eskatzaile handien artean kokatzea.

ERABILGARRITASUN-EREDUAK: ÑABARDURAK DITUEN EGONKORTASUNA

Bizkaiak 60 eskabide aurkeztu ditu, hau da, Euskadin erregistratutakoen erdiak ia-ia. EAE osoa zertxobait hazi da, 127 eskabide aurkeztu ditu-eta.

Enpresen eta partikularren arteko oreka ezaugarri interesgarria da: bi taldeek ia-ia kopuru bera eskatu dute erabilgarritasun-ereduen arloan.

Emakidetan, ordea, beherakada handia egon da Bizkaian nahiz EAEn. Gehienak ingeniaritza mekaniko eta zibilarekin lotutako arloetakoak dira.

DISEINU INDUSTRIALAK: ESKABIDEEK BEHERA EGIN DUTE, ETA PROTAGONISTAK ALDATU DIRA

Diseinu industrialek ere behera egin dute. Bizkaiak 17 eskabide aurkeztu ditu, eta EAE 55etik 35era jaitsi da.

Berritasun nagusi moduan, partikularrak lehen aldiz daude enpresen gainetik modalitate honetako eskatzaile nagusi moduan.

Emakidetan, beheranzko joera errepikatu da, enpresen eta partikularren arteko banaketa ia-ia berdina bada ere.

MARKA NAZIONALAK: HAZKUNTZA MODERATUA

Beste modalitate batzuen aldean, marken portaera egonkorragoa izan da. Euskadin, 1.829 eskabide aurkeztu dira, eta, Bizkaian, 944 emakida lortu direnez, EAEn erregistratutakoen erdiak baino gehiago izan dira.

Oraindik ere, enpresak liderrak dira eskabideetan eta emakidetan, nahiz eta partikularren aldean pisu apur bat galdu duten. Gipuzkoan, 615 emakida lortu direnez, Bizkaiaren aurretik dago oraingo honetan.