Txostenean azpimarratu denez, kobotak automatizazioa ezartzeko aukera demokratizatzen ari dira, eta, aldi berean, pertsonen zein makinen arteko harremana berriro zehazten ari dira ekoizpen-inguruneetan. Bildutako datuen arabera, Europako lider industrialen %93k aurreikusi dutenez, hurrengo hamarkadan gutxienez haien langileen %10ek ukondoz ukondo lan egingo dute elkarlanerako robotekin. Gainera, %47ren zenbatespenaren arabera, proportzio hori langileen laurden batekoa izango da. Espainiaren kasuan, baikortasuna are handiagoa da, gainera: enpresen %91ren ustez, badute euren eragiketen %10 baino gehiago koboten bidez automatizatzerik, eta, %48ren esanetan, badute %25 ere gainditzerik.

Manufaktura-enpresa handietara mugatu beharrean, kobotek gero eta agerpen handiagoa dute zenbait sektoretan; esate baterako, elikadura, logistika edo elektronika. Hori dela eta, eguneroko tresna moduan integratu dira ekoizpen-prozesuetan. Hedatu egin dira, eraginkortasuna bilatzen delako eta, horrez gain, enpresak erresilienteak izan behar direlako ezegonkortasun geopolitikoa, inflazioa eta lanesku prestatu urria ezaugarri bereizgarri dituen ingurunean. Garestiagoak eta zurrunagoak diren sistema robotiko tradizionalen aldean, kobotek erakundeei ematen diete honako hauexetara arin-arin egokitzeko aukera: ekoizpen-ziklo laburrak, eskaera aldagarriak eta oso-oso pertsonalizatuta dauden prozesuak.

Txosteneko aurkikuntza adierazgarrienetakoaren arabera, automatizazioak lanean daukan eraginari buruzko iritzia aldatu da. Inkestatutakoen erdien baino gehiagoren ustetan, robotikak suntsituko dituen baino enplegu gehiago sortuko ditu hemendik 2030era. Espainian, esaterako, enpresen %61 daude ados ikuspegi baikor horrekin. Enplegua suntsituko ote duen ohiko beldurraren aldean, orain beste ikuspegi bat da nagusi, eta, bertan, automatizazioak langileak askatuko ditu errepikakorrak edo eskakizun fisiko handikoak diren zereginetatik. Hori dela eta, aukera berriak eskainiko ditu zenbait arlotan; esate baterako, programazioa, mantentze-lanak, ingeniaritza edo kalitatearen kontrola.

Azken batean, txostenean azaldutakoaren arabera, Europa erabakigarritasunez aurrera egiten ari da adimendunagoa, jasangarriagoa eta konektatuagoa den ekoizpen-eredurantz, eta, bertan, zenbait teknologia industriaren oinarriak zehazten ari dira berriro; esate baterako, kobotak, adimen artifiziala eta datuen analisi aurreratua. Egoera berri horretan, gainera, automatizazioak ez ditu langileak alboratzen, haien gaitasunak zabaltzen dituelako eta, horrela, ahaldundu egiten dituelako, eraldaketa teknologikoko eragile aktiboak izan daitezen.

industrytalks.es