Enpresetako negozioen prozesuak eta elkartutako dokumentazioa kudeatzeko Digitalizazioaren bilakaeraren prespektiba praktikoak da ekitaldiaren izena. Jardunaldian digitalizazioarekin lotutako hiru alderdi nagusi landuko dira: transakzio digitalen aldaketa legalak eta teknologikoak negozio-prozesuen kudeaketan; bitarteko elektronikoen erabilera modernizatua BEZaren kudeaketan eta enpresen fakturazio-betebehar berriak (596/2016 Errege Dekretuan jasoak); eta, azkenik, Dokumentuen Kudeaketa Digitaleko jardunbide egokiak enpresaren esparru desberdinetan.

Jardunaldian parte hartuko dute euskal enpresa pribatu eta erakunde publikoetako arduradunek. Datuen Babeserako Euskal Agentziak hitzaldi bat emango du Datuen Babeserako Europako Araudiari buruz, eta IZENPEk, berriz, bere ikuspegia azalduko du transakzio elektronikoen ziurtagiriek izandako bilakaerari buruz (nortasun digitala, kaptura bio-metrikoak eta lainoko zerbitzuak).

LKS Abogados-ek hizpide hartuko ditu Compliance-k dokumentuen digitalizaziora ekarri dituen nobedadeak, eta Mercedes Benz, Petronor eta ISEA enpresek azalduko dute nola garatu duten beren negozioen digitalizazio prozesua esparru desberdinetan: Giza Baliabideak, kontratuak eta jabetza intelektualaren babesa. Topaketa doakoa da, Garaia Berrikuntza Gunean egingo da (Arrasaten) eta SPRI Taldeak koordinatuko du Garaia Enpresa Digitala ekimenaren bitartez.
Lekua eta data: Mondragon, 2017ko otsailaren 16a

spri.eus