Ikerketa berri batek dio lotura zuzena dagoela Adimen Artifizialean (AA) oinarritutako itzulpenaren eta nazioarteko merkataritzaren hazkundearen artean.

Azterlan horrek eBay plataformaren (produktuak Internet bidez subastatzeko eta salerosketa elektronikoak egiteko ataria) datuak erabili ditu AAk nazioarteko merkataritzan duen inpaktua neurtzeko.

Hala, ikerketak egiaztatu du AA bidezko itzulpenaren hobekuntzaren ondorioz eBay bidezko herrialde arteko merkataritza %10,9 hazi dela.

Kontuan izan behar da ebaluazioa 2014. urteari buruzkoa izan dela eta, urte hartan, eBay-k 14.000 milioi dolarretik gora kudeatu zituela 200 herrialde baino gehiagoren arteko salerosketa elektronikoetan.

Ikerketak Estatu Batuetako erosle eta saltzaileen arteko emaitza komertzialak alderatu zituen normalean ingelesik hitz egiten ez duten herrialdeetako emaitzekin, alderaketa horretan sartu direlarik Latinoamerika, Europa eta Asiako herrialdeak.

eBay atariak AAz lagundutako itzulpen automatikoko zerbitzu bat inplementatu zuen 2014an, eta horren aurreko zein ondorengo emaitzak aztertu ziren. Hainbat neurketa egin ondoren, ikertzaileek ikusi zuten zerbitzu horrek %10 inguru hobetu zuela itzulpenaren kalitatea.

Beste ondorio baten arabera, itzulpen automatikoko zerbitzu hori eskaintzeak %26,1 murriztu ditu herrialdeen arteko distantziak.

Management Science aldizkariak argitaratuko du emaitza horiek biltzen dituen artikulua, baina bada aurre-inpresio bat Social Science Research Network atarian, non berehala zabaltzen baitira gizarte eta giza zientziei buruzko ikerketen albisteak.

tendencias21.net