Carnegie Mellon Unibertsitateko eta beste erakunde batzuetako ikertzaileek sortu duten aplikazio esperimentalak pertsona baten ahotsa aztertuz jakin dezake pertsona horrek baduen COVID-19a. Adimen Artifizialarekin funtzionatzen duen aplikazio honek ez du jaso oraindik medikuntzako erakunde ofizialen balioztapenik eta inolaz ere ez du ordezkatzen gaixotasuna detektatzeko erabiltzen den egiaztapen test homologatua.

Neoscope aldizkariak jakinarazi duenez, oraindik fase esperimentalean dagoen arren, aplikazio honen algoritmoa gai izan liteke birusaren hedapenaren jarraipena egiteko, batik bat kontuan izanik zenbat eta datu gehiago bildu orduan eta zehatzagoa izango dela. Doako aplikazio bat da, edonork eskuratu dezakeena jakiteko baduen SARS-CoV-2 birusa, eta nahikoa da erregistratzea.

Erabiltzailea sakelakotik edo ordenagailutik sar daiteke aplikaziora: behin sartutakoan, bere ahotsa aztertzen du infekzioaren arrastoen bila. Halaber eskatzen die erabiltzaileei egin dezatela eztul, graba ditzatela hainbat soinu eta errezita dezatela alfabetoa. Aplikazioak giza ahotsaren mikro-sinadurak identifikatzen dituzten algoritmoak erabiltzen ditu, mikro-sinadura horiek pertsona baten datu psikologikoak, fisiologikoak eta medikoak ematen dituztelako.

Covid-19ak eragindako eztula bereziki esanguratsua da analisirako, zeren, aplikazioaren sortzaileek diotenez, bereziki eragiten baitie birikei. Koronabirusa duen pertsona batek eztula egiten duenean, arnasketaren patroiak eta beste bizi-parametro batzuk modu espezifiko batean aldatzen dira, eta horixe da aplikazioak aztertzen duena.

Eta hori guztia ahotsean islatzen denez, ahotsa behar bezala aztertuz gero, diagnostiko orientatibo bat egin daiteke jakiteko erabiltzaileak baduen Covid-19a.

tendencias21.com