Suo Langcidan Tibeteko herrixka urrun batean bizi da, 4.000 metrotik gorako garaieran. Hainbat aste daramatza eztul handiarekin eta buruko-minarekin. Horregatik erabaki du mediku bati kontsulta egitea. Ez da etxetik aterako, baina handik 4.000 kilometrora, Shangain dagoen mediku batek atendituko du. Sakelakoa piztu eta Xuhui ospitaleko telemedikuntza aplikazioa ireki du, bere sintomak azaldu ditu hasierako inprimakian, eta medikuak atenditu zain dago.

Xu Rong da bere kasua ordenagailuko pantailan jaso duen doktorea. Eta hasi da bideokonferentzia: nahiz eta koronabirusa oraindik ez den iritsi Tibetera (oso gutxi dira garbi dauden Txinako eskualdeak), elkarrizketa labur baten ondoren, aplikazioak berak arnasketa aparatuko espezialista batengana bideratu du Suo, arreta hobea jaso dezan. “Probaren bat egin behar bazaio, etxean bertan egingo diote edo hurbilen daukan osasun zentrora joan daiteke. Gero, emaitzak aplikaziora igoko dira eta berehala aztertuko ditugu hemen”, dio.

Hurrengo kontsulta are urrunagotik iritsi da. 41 urteko Lei Ping Frantziatik ari da deika. Kezkatuta dago, uste duelako Europan ez direla hartu behar besteko neurriak epidemiari aurre egiteko, eta bizpahiru egun daramatza ondoezik eta eztularekin, baina sukarrik gabe. “Gune jendetsuetan egon zara edo Txinako norbaitekin harremanetan?” galdetu dio Xu doktoreak Lei-ren mediku-espedientea irakurtzen duen bitartean (programaren erlaitz bat klikatuta agertzen zaio).

Xuhui-ko ospitalea da urruneko osasun arreta eta tratamenduak eskaintzeko baimena jaso duen Shangaiko lehen osasun zentro publikoa. “Aplikazio hau 2015ean garatu genuen mediku-zerbitzuak estandarizatzeko, zerbitzuen kalitatea asko aldatzen baita leku batetik bestera” azaldu du Sun Mingming-ek, Shangaiko Osasun Batzordeko Administrazio Medikoko Sailaren zuzendari exekutiboak. “AAA erietxeetako -herrialdeko onenak- zerbitzua eskaini nahi dugu herrialde osoan. Eta adimen artifizialeko tresnak baliatzen ditugu diagnostikoa egiten laguntzeko eta kasu kronikoei jarraipena egiteko” gaineratu du.

Erietxe birtualak 20 probintziatako 1,82 milioi pertsona atenditu ditu dagoeneko. Eta pentsa litekeenaren kontrara, kontsultak egin dituzten gehienek (% 45,8) 40 eta 60 urte bitartean dituzte.

retina.elpais.com