Moldaerraza denez eta isuri kutsagarririk gabe ekoizten denez, hidrogeno berdea aukera baliotsuenetakoa da klima-aldaketari aurre egiteko moduko energia sortu ahal izateko. Dena dela, bere erabilera orokortu dadin, bi gauza behar dira: bere ekoizpena areagotzea (gaur egun, hidrogenoaren hornikuntza ia-ia erabat gas naturalaren eta ikatzaren menpean dagoenez, hidrogeno hori ez da berdea) eta kopuru handiagoa ekoiztea. Horretarako, bederatzi bilioi dolarreko inbertsioa (8,2 bilioi euro) egin beharra dago, Deloittek 2023. urte honetan egindako ‘Green hydrogen: Energizing the path to net zero’txostenaren arabera (‘Hidrogeno berdea: zero garbiranzko bidea energizatzen’).

Unibertsoko konposatu kimiko ugariena bada ere, hidrogenoa beste batzuekin nahastuta agertzen da beti. Hori dela eta, energia-iturri moduan erabili ahal izateko, lehenengo eta behin sintetizatu egin behar da. Hidrogeno berdea uraren bidez ekoitzitakoa da(oxigenotik bereizten duen elektrolisiaren bitartez), eta, horretarako, energia-iturri berriztagarriak erabiltzen dira; esate baterako, eguzki-energia eta energia eolikoa.

Hori beti horrela ez denez, hidrogenoa lortzeko egindako prozesuaren arabera, zientzialariek elementu horren zenbait-mota zehaztu eta koloreen arabera sailkatu dute. Hartara, hidrogeno beltza edo marroia ikatzaren gasifikazioaren bidez ekoizten da, eta metodo horrek karbono dioxido (CO2) asko-asko sorrarazten du. Bestetik, hidrogeno grisa metanoaren edo gas naturalaren bidez ekoizten denez, gas kutsagarriak ere sorrarazten dira.