Auto autonomoen iraultzaren ardatz nagusian elementu berri bat agertu da, gidatzean ia inork sumatzen ez duena: haizetakoa. Hemendik gutxira, autoaren aurrealdeko kristala funtzio anitzeko pantaila bilakatuko da: gidatzeko esanguratsua den informazioa jasoko du eta pelikulak edo publizitate iragarkiak proiektatuko ditu autoan doazenentzat. Aurreikuspenek diote bost urte barru gertatuko dela hori, baina aurreikuspenak oso baikorrak izaten dira.

Dagoeneko badaude haizetakoan (eta bertan txertatutako kamera eta sentsoreetan) oinarritzen diren hainbat laguntza-sistema, adibidez, gurutzaldi-kontrol egokigarria, erreitik ez ateratzeko alerta edo haizetako-garbitzaile eta argi automatikoak. Horiez gain, bada ezinbestean kristalean oinarritzen den beste elementu bat: Head Up Display (HUD) du izena eta autoaren datuak (abiadura, nabigatzailearen oharrak edo seinaleen errekonozimendua) proiektatzen ditu gidariak errepidera begiratzeari utzi gabe kontsulta ditzan. Hauxe da haizetakoaren hurrengo eboluzioaren abiapuntua: errealitate handitua, 3D eta, batez ere, informazioaren proiekzioa. Arrazoi praktikoak eta arrazoi ekonomikoak (fase aurreratuago batean) daude bilakaera horren atzean.

Adituek diote hiru dimentsiotako bistaratze-sistemekin hobeto egituratu eta ulertzen direla mezuak, eta gidariak hiru dimentsiotako ingurune batean mugitzen dira. Stuttgarteko Unibertsitateko azterlan batek ondorioztatu du 3D teknologiak (HUDek horixe erabiltzen du) gidariaren erreakzioak azkartzen dituela eta distantzia nahiz sakonera kalkulatzen laguntzen duela. Hori garrantzitsua izango da 3. mailako auto autonomoetan, zeintzuetan gidariak prest egon beharko duen autoaren kontrola hartzeko edozein unetan.

elpais.com