Adimen artifizialaren erabilera gero eta gehiago ari da zabaltzen industria guztietan, eta batik bat retail sektorean, non erabilpen intentsiboagoa baitu. Ondorio horretara iritsi da McKinsey aholkularitzaren txosten bat (eskualde, industria, enpresa, espezialitate eta eros ahalmen desberdinetako 2.360 parte-hartzaileko lagin batean oinarritua), non ikusten baita teknologia horren erabilpena %25 hazi dela 2018tik hona.

Zehazki, 2018an konpainien %47k txertatu zuten AA gaitasunen bat prozesu edo produkturen batean, 2019an, berriz, %58k. Kontsultatutako zuzendaritza-kargu gehienek (% 63) diote horrelako teknologiak erabiltzen hasi direnetik hobetu egin dituztela euren antolakundeen diru-sarrerak, eta % 44ren arabera, gastuak murrizteko ere balio izan du.

Dena den, adimen artifizialaren erabilera retail sektorean hazi da gehien azken urte honetan: nitxo horretako enpresen %60k adimen artifizialeko gaitasunen bat txertatu du gutxienez bere negozioko funtzio edo unitate batean edo gehiagotan.

Etorkizunera begira, enpresetan AA prozesuren bat txertatu duten inkestatuen %74k uste dute euren antolakundeek gehiago inbertituko dutela arlo honetan datozen hiru urteetan. Inkestatu horien erdiak baino gehiagok aurreikusten du hazkundea %10 edo gehiagokoa izango dela.

computerworld.es