Hozkailuak, koltxoiak, kafe makinak, ordulariak, eskumuturrekoak… Hasi gailu handienetatik eta txikienetaraino, gure bizitzako eguneroko objektuak sarera konektatzen dira erosketak egiteko, gosaria prestatzeko edo hobeto lo egiten laguntzeko. Baina Gauzen Internetek dakarren iraultza txiki gera liteke mundu mikroskopikoa jokoan sartzen bada.

Nanoteknologia eta bioteknologia arloetan egin diren aurrerapenei esker, zientzialariak gai izan daitezke bakterien ezaugarri berezi batzuk aprobetxatzeko eta, horrela, osasunaren arloan hainbat aplikazio izan ditzaketen komunikazio sare biologikoak sortzeko. Arlo honetan eman diren lehen urratsak oso berriak dira oraindik. Iaz, Paduako Unibertsitateko (Italia) ikertzaile talde batek zirkuitu bat eraiki zuen E. coli zepa ibilge batekin, zeina gai izan baitzen zepa mugikor bati testuzko mezu sinple bat igortzeko, hark informazioa beste toki batera eraman zezan.

E. coli bakteriaren kasua esanguratsua da, badituelako hainbat ezaugarri berezi. Bakteria hori gai da bere inguruko hainbat agenteri buruzko informazioa biltzeko (tenperatura, argia edo produktu kimikoak), informazio hori bere DNAn gordetzeko eta ribosomak erabiliz prozesatzeko. Gainera, mugitu ere egin daiteke, bultzada indarra sortzen duten flageloz osatutako motor batekin.

Hala, bakteria horiek programatu eta itsasoan edo beste ingurune batzuetan hedatu ahal izango lirateke “toxina eta kutsagarriak detektatzeko, datuak biltzeko eta bio-erremediazio prozesuak hasteko”. Orobat balio dezakete hainbat gaixotasun tratatzeko, giza gorputzean ibil baitaitezke eta organismoari lagunduko dioten hormonak askatu barruko sentsorea aktibatzen denean.

elpais.com