Orain badakigu kontaktu sozialak arakatzea urrats estrategikoa dela koronabirusari (COVID-19) aurre egiteko, eta agintariak hasi dira hainbat neurri inplementatzen azterketa horiek egiteko. Baina smartphone bidezko monitorizazioa ez da hori lortzeko bide bakarra. San Frantzisko (AEBak) hiriak lantalde bat sortu du COVID-19an positibo eman duten pertsona guztiak elkarrizketatzeko eta haien elkarreraginei jarraipena egiteko. Jakin nahi da nork kutsatu zituen eta nortzuk kutsatu dituzten eurek, asmoa baita infektatutako pazienteak isolatzea, arriskuan egon direnak ohartaraztea eta, azkenik, transmisioa geldiaraztea.

Hiriko Osasun Publikoko Sailak dozenaka ikertzaile, medikuntzako ikasle eta Kaliforniako Unibertsitateko (San Frantzisko) beste hainbat kide kontratatu ditu, eta baliteke bestelako langile publiko gehiago ere hartzea. Udaleko osasun-langileak maila mugatuan hasi ziren kontaktuak arakatzen, baina pixkanaka, asteek aurrera egin ahala, maila hori zabaltzen ari dira. 40 pertsonako lantalde bezala sortu zena, 150 langilera iritsi daiteke.

Elkarrizketez gain, lantaldeak beharrezko laguntza eskaintzen du kutsatuak guztiz isolatuta daudela bermatzeko, eta aterpea bilatzen ere lagunduko die, beharrezko bada. Halaber, saiatzen dira gaixoarekin aurreko egunetan harremanetan egon diren 3-5 lagun lokalizatzen, infektatuta egon litezkeela ohartarazteko. Hala, pertsona horiei eskatzen diete mugatu ditzatela euren jarduera sozialak eta egin dezatela diagnostikoko proba bat. Eta prozesua berriro hasiko litzateke test horietan positibo eman dutenekin (elkarrizketak eta euren kontaktuen jarraipena).

Diagnostikoko proba gehiago egitea ere funtsezkoa izango da kontaktuak eraginkortasunez monitorizatzeko, izan ere, ikertzaileek probak egin beharko dizkiete sintomak dituzten pertsona guztiei, bai eta pertsona horiekin kontaktuan egon direnei, eta emaitzak lehenbailehen eskuratu. Rutherford-en arabera, ahalegin hori babesteko eta gaitzaren agerraldiari eusteko (maila lokalean), San Frantzisko hiriak gai izan behar luke hilean 130.000 proba egiteko.

Lantalde "Dimagik" garatutako aplikazio bat darabil, zeinak kontaktuen jarraipena egiten baitu telefonoz eta online, kasuak kudeatzeko eta etengabeko arreta emateko. Besteak beste, sistema honek testuzko mezuak bidaliko dizkie egunero arriskuan egon daitezkeen pertsonei, sintomarik garatu duten galdetuz. Erantzuna baiezkoa bada, langileek jarraipena egingo diete eta aholku gehigarriak eskainiko dizkiete.

Halaber, lantaldeak baimena eskatuko die pazienteei euren telefonoko kokapen-datuak ikusteko, informazio hori baliagarri izango baita hobeto jakiteko non egon diren gaixoak eta noiz egon diren jende asko zegoen tokietan. Baina biztanleria osoaren telefono datuak eskuratu ezik, lantaldeak ezingo du jakin noiz gurutzatu ziren beste kutsatu batzuekin, ez eta nortzuk diren pertsona horiek.

technologyreview.es