Honako hauexek izan dira txostenaren funtsezko aurkikuntzak:

DIGITALIZAZIOAREN AURRERAPENAK

Enpresen %91k aurrera egin dute digitalizazioan, oinarrizko teknologien, teknologia aurreratuen edo bien bidez. Hori dela eta, hazkuntza %1,9koa izan da aurreko urtearen aldean.

DIGITALIZAZIOKO FASEAK

Azterlanari esker, Bizkaiko enpresak zenbatu eta sailkatu dira aurreratuago dauden edo hain aurreratuta ez dauden zenbait teknologiaren arloan izandako ohiko erabileraren arabera. Horretarako, honako sailkapen hau erabili da: OINARRIZKO DIGITALIZAZIOA eta DIGITALIZAZIO AURRERATUA* (sailkapenaren taula ikusi). Bertan azaldutakoaren arabera, enpresen %65,3ren maila oinarrizkoa da, eta ez dute aldaketarik eduki 2023. urtearen aldean. %25,7k, ordea, maila aurreratua dute, eta hazkuntza 2,2 ehuneko-puntukoa izan da segmentu horretan.

SEKTORE DIGITALIZATUENAK ETA EZ HAIN DIGITALIZATUAK

Sektoreen araberako analisian adierazten denez, aldaketa nabaria izan da enpresen digitalizazioan. 2023ra arte, industriaren sektorea zen teknologia digital gehien erabiltzen zituena (%90,5, 2024ko %89,7ren aldean), eta eraikuntzaren sektorea zen hain digitalizatuta ez zegoena. 2024an, ordea, aldaketa adierazgarria gertatu da. Eraikuntzak aurrera egin duenez, digitalizazio-maila handiena daukana da gaur egun, enpresen %92,5ek ebaluatutako teknologiaren bat ezarri dutelako, nahiz eta gehienen maila oinarrizkoa izan.

2023. urtearen aldean, badago beste aldaketa handirik, digitalizazio-maila aurreratuan enpresa gehien dituen sektorea delako, hain zuzen ere. Aurreko urteetan, industriaren sektorea zen arlo horretako liderra. 2024an, ordea, zerbitzuen sektoreko enpresak dira digitalizazio aurreratuan maila handiena lortu dutenak (%28,1).

EZARRITAKO TEKNOLOGIA NAGUSIAK

Oraindik ere, enpresek gehien ezarri duten teknologia kudeaketa aurreraturako softwarearekin zerikusia daukana da (esate baterako, CRMak, ERPak…), %69,3tik %78,3ra igo delako. Izan ere, oraindik ere hedatzen ari den oinarrizko teknologia bakarra da, 14,3 ehuneko-puntu igo delako 2022. urteaz geroztik. Bestetik, honako teknologia hauek ere nabarmentzen dira: zibersegurtasuna (%61,8), cloud computinga zein birtualizazioa (%42,1) eta merkataritza elektronikoa (%38,9).

Teknologia aurreratuei dagokienez, joera aldatu egin dela baieztatu da, aurreko urtean antzeman zen bezala. Izan ere, orain arte enpresek gehien ezarritako teknologia aurreratua 3Dko simulazioarekin eta eredu birtualekin lotutakoa bazen ere, 2024an adimen artifiziala da lehenengo posizioan dagoena. Erabilera ia-ia bikoiztu egin da lurraldeko enpresen artean, euren egunez eguneko prozesuetan modu proaktiboan ezarri dituztela onartzen duten erakundeen kopurua 2023ko %8,9tik 2024ko %16,6ra igo da-eta.

DIGITALIZAZIOAREN ONURAK

Onurak multzoetan banatuz gero, gehien nabarmentzen dena kalitatea da, enpresen %65,5ek aipatu dute-eta. Ondoren, honako hauexek ere aipatu dituzte, neurri txikiagoan bada ere: informazioaren erabilera (%33,5), malgutasun handiagoa (%20,4) eta eraginkortasun handiagoa (%17,4). Onurak erabilitako teknologiaren arabera aztertzean, kalitatearekin lotutakoak iraunkorrak dira ia-ia, erabilitako teknologia edozein dela ere. Aldeak, ordea, nabariagoak dira zenbait arlotan; esate baterako, informazioaren erabilera, malgutasuna eta eraginkortasuna.

INDAR NAGUSIAK

Era berean, eraldaketa digitalari aurre egiteko orduan enpresek eskuragarri dituzten tresnak eta gaitasunak ere ebaluatu dira. Alde horretatik, enpresek inbertsiorako ahalmenean eta beharrezko baliabideen lorpenean hobera egin dutenez, errazago integratu dira digitalizaziorako prozesuan. Horrez gain, aitortu egin dute hobeto dakitela zein diren administrazioek digitalizaziorako eskaintzen dituzten laguntzak. Talentuarekin lotutako tresnei dagokienez, zertxobait handitu da euren langileen funtsezko jakintzak zein izan behar diren zehaztu dutela baieztatu duten enpresen ehunekoa (%89,1).

Bestetik, berriro ere nabarmendu egin da enpresen %88,5ek digitalizazioari aurre egiteko azpiegitura egokia dutela adierazi dutela; esate baterako, Interneterako konexioa eta beharrezko ekipamenduak. Halaber, enpresen %81,9ren esanetan, langileen jarrera aldekoa da erabat, baina %85,6k baieztatu egin dute haien zuzendaritza ondo prestatuta dagoela aldaketa kudeatzeko.

AHULEZIA ETA OZTOPO NAGUSIAK

Era berean, enpresek digitalizaziorako prozesua zailtzen duten zenbait oztopo ere badituzte. Horri dagokionez, profil teknologikoak aurkitzeko zailtasunak omen dauzkaten enpresen ehunekoak gora egin du, %48,4tik %59,5era igo delako. Hori dela eta, oraindik ere, enpresen ahulgunea da digitalizazioan aurrera egiteko orduan. Bestetik, establezimenduentzat denbora-falta ere bada oztopoa, eta, horrez gain, areagotu egin da, %48,7tik %56,1era igo delako digitalizazioari aurre egiteko astirik ez dutela dioten enpresen ehunekoa. 2024an, gainera, behera egin du digitalizaziorako plana zehaztuta omen daukaten enpresen kopuruak, %41,3koa delako 2023an eduki bazutela ziotenen %44,5en aldean. Jaitsiera horrek zerikusia izan dezake erakundearen kulturarekin edo lan-indarraren trebetasun teknologikoen faltarekin.

AURREIKUSITAKO ERAGINA

Enpresa gehienen ustez, digitalizazioak eragin adierazgarria izango du haien sektorean, eta negozioa garatzeko aukera moduan ikusten dute. Adimen artifiziala teknologia disruptiboena da.

ETORKIZUNEKO INBERTSIOAK

Aurreikuspenen arabera, hamar enpresatatik zazpik oinarrizko digitalizaziorako teknologietan inbertitzen jarraituko dute hurrengo hiru urteetan, neurri handiagoan edo txikiagoan. Digitalizazio-maila aurreratuko berezko teknologiei dagokienez, enpresa guztien %25,0k adierazi egin dute automatizaziorako aplikazio edo teknologia batzuetan sakontzeko asmoa dutela hiru urteko epean. Beraz, kopurua 2023koa bezalakoa da ia-ia.

ESKATUTAKO LAGUNTZAK

Administrazioek eman dezaketen laguntza ekonomikoa da enpresek digitalizatzen jarraitzeko eskatzen duten laguntza nagusia (%63,8). Horrelako laguntzak are eskari handiagoa dauka, teknologiak konplexuagoak diren neurrian, fase aurreratuetan gertatzen den bezala. Hartara, digitalizazioko fase aurreratuan dauden enpresen %73,9k horrelako laguntza aipatu dute, oinarrizko fasean daudenen %61,7ren aldean.

ONDORIOAK

Laburbilduta, txostenean azaltzen denez, egoera ona da Bizkaiko enpresen digitalizazioan, eta badirudi horrelaxe jarraituko duela, enpresek argi eta garbi dutelako lortutako eragina handia izango dela, euren sektorean nahiz enpresan bertan. Beraz, agerikoa da digitalizazioa prozesu saihestezina dela, lehen hain digitalizatuta ez zeuden sektoreetan aurrera egin duela eta adimen artifiziala ezartzea dela xede argia.

Nolanahi ere, ateratako informazioaren arabera, egia ere bada oinarrizkotzat jotako tresna teknologikoen ezarpena moteldu egin dela, horrelako teknologietan inbertitzeko asmoa %78,4tik %71,7ra jaitsi dela kontuan hartuta. Beraz, seguruenik, arlo horretan nolabaiteko heldutasuna daukatela uste dute enpresek.

Antzemandako egoera hori ona den arren, oraindik ere badago erronkarik, giza baliabideen arloan eta laguntza finantzarioaren premian, batez ere.

IKUSI LABURPENA

IKUSI TXOSTENA