Etengabe berritzen duten enpresak kontuan hartzen baditugu, ikusiko dugu %30,7k modu jarraituan garatu dituela berrikuntza jarduerak 2012-2015 epealdian; horrek esan nahi du halako enpresen kopurua nabarmen hazi dela eta tarte txikiagoa dagoela hobetzeko jarduera puntualak egiten dituztenen eta berrikuntzak denboran zehar modu planifikatuan garatzen dituztenen artean.

Gainera, inkesta honi esker egiten den Berrikuntzaren Intentsitatearen Indizeak (jarduera berritzailearen sistematizazio gradua neurtzen duenak) adierazten du enpresa berritzaileen %30,7k berrikuntza maila handia edo oso handia duela. Portzentaje hori iazkoa baino apur bat handiagoa da (%29,6).

Norabidea 2016 txostenean bada beste ondorio nagusi bat ere, enpresen %67,2k uste baitu berritzeko hartutako erabakia arrakastatsua izan dela. Hona hemen lortu dituzten emaitzak: kalitate handiagoa (%83,5), produktu-sorta zabalagoa (%79), fakturazio handiagoa (%77,2), eta malgutasun handiagoa produkzioan (%74,5).

Azterlanaren emaitzetan ikus daiteke lankidetza faktore erabakigarria dela berritzeko prozesuetan. Enpresen %41,8k diote beste batzuekin lankidetzan aritu direla (portzentajea 7 puntu hazi da) eta gero eta protagonismo handiagoa ematen dietela merkatuko eskakizunei. Hiru enpresatik batek lankidetzan jarduten du modu jarraituan (%36,6).

Hona hemen Norabidea 2016 azterlanean analizatu diren alderdi batzuk:

• Bizkaiko enpresen jarduera berritzailea
• Berrikuntza intentsitatearen indizea
• Enpresetako berrikuntzaren ezaugarriak
• Enpresa ez berritzaileak, nolakoak diren eta zergatik ez duten berritzen.
• Kultura berritzailea: giza kapitala, ezagutzaren kudeaketa eta berrikuntza babesteko metodoak.
• Lankidetza da berrikuntzarako bidea
• Marketin eta merkaturatze arloetako berrikuntzak