“Etorkizuneko fabrika sortzen lagunduko diguten gakoak dira gure zentroen aberastasun kulturala, gure produkzio sistema aplikatzea eta gure berrikuntzak mundu osora zabaltzea” dio José Vicente de los Mozosek, Renault Taldeko fabrikazio eta logistika arloetako mundu mailako zuzendariak. Automozioaren sektorea asaldatu samar dago, denboran bat egin duten hainbat faktore direla medio. Elementu horiek guztiek sortu dute “4.0 iraultza”, zeinak ezaugarritzat baititu ibilgailu elektrikoen hazkundea, lehen eredu autonomoak, auto bat erostean gero eta gehiago eskatzen den pertsonalizazioa eta bezeroari protagonismo gehiago eman beharra, ez bakarrik fabrika barruan, baizik eta baita ere produkzio prozesuetan.

Planteamendu honekin, “Renaultek bi helburu bete nahi ditu: ibilgailuen kalitatea eta sistema industrialaren lehiakortasuna bermatzea”. Iraultzak berekin ekarri ditu hainbat aurrerapen, abiadura bizian inplementatzen ari direnak, esaterako, QR kodeak eta RFID txipak erabiltzea piezetan, eta pieza horiek datu-baseekin konektatzea, elementu bakoitzaren kalitatea kontrolatzeko prozesu osoan.

Gainera, trazagarritasunak aukera ematen du eskaera bakoitzaren jarraipen zorrotza egiteko: bezero batek ibilgailu bat erosten duenean, lehengaiak prestatzen dira, hornitzaileei jakinarazten zaie eta logistika-fluxuak ezartzen dira. Produkzioko etapa guztiak erabat sinkronizatuz gero, bermatu daiteke epeak zorrotz betetzen direla, hasi hornitzailetik eta amaierako bezeroarenganaino.

elpais.com