Soldaten desberdintasuna da ekonomiaren arazo larrienetako bat. Politikak formulatzen dituztenek badute tresna eraginkor bat arazo horri aurre egiteko: zergak. Gobernuek diru-bilketa antolatzen dute pertsonen irabazien arabera, eta gero birbanatu egiten dute diru hori, dela zuzenean, laguntza sozialeko ereduen bitartez, edo dela zeharka, proiektu publikoak ordaintzeko erabiliz. Baina, zerga-ezarpen handiagoak berdintasun handiagoa ekarriko lukeen arren, zerga gehiegi kobratzeak berekin ekar dezake lanerako pizgarriak galtzea edo jendea iruzur egitera bultzatzea, eta horrek denon itsulapikoa hustuko luke.

Enpresentzako teknologiaren sektoreko Salesforce enpresa estatubatuarreko zientzialariek uste dute adimen artifizial (AA) hau lagungarri izan litekeela. Richard Socher-ek zuzendutako lantalde batek AI Economist izeneko sistema bat garatu du, zeinak ikaskuntza indartua baliatzen baitu, hau da, DeepMind enpresaren AlphaGo eta AlpahZero sistemen adimen artifizialeko teknika berbera. Bere helburua da ekonomia simulatu baterako zerga-politika onenak identifikatzea. Tresna nahiko sinplea da (ezin dira kontuan hartu mundu errealaren eta gizakion portaeren konplexutasun guztiak), baina lehen urrats itxaropentsua da politikak modu guztiz berri batean aztertzeko. “Izugarria litzateke lortuko bagenu zerga-politika hain politikoa ez izatea eta gehiago oinarritzea datuetan” azpimarratu du lantaldeko kide Alex Trott-ek.

technologyreview.es