Egoitza Berkeleyn (AEBak) duen robotika arloko startup txiki batek erronka bat jaso zuen 2018ko udan. Biltegiko logistika-teknologien hornitzaile handi batek, Knapp enpresak, beso robotiko berri bat behar zuen, adimen artifizialeko (AA) teknologiak gidatua eta albait objektu desberdin gehien eusteko gai zena. Hala, hilabete eta erdiz, erraldoiak astero bidaltzen zion startup-ari gero eta konplexuagoak ziren artikuluz osatutako zerrenda bat, bere bezeroen produktu-sorta osoa ordezkatzen zutenak (kaxa ilunak, kaxa gardenak, pilula paketeak, galtzerdiak, e.a.). Startup-ak artikulu horiek erosten zituen eta astebete geroago bideo bat bidaltzen zion enpresari, zeinetan ikusten baitzen beso robotikoa gai zela artikuluak edukiontzi batetik bestera eramateko.

Enpresa txikiak garaitu egin zituen Knapp handiko exekutiboak. Exekutibo horiek sei edo zazpi urte zeramatzaten startup-ei erronka jotzen, baina inork ez zuen lortu gainditzea. Horregatik, oraingoan ere emaitza bera espero zuten. Baina, denen harridurarako, jasotako bideoan ikusten zen startup honen beso robotikoak objektu guztiak mugi zitzakeela, zehaztasun bikainarekin eta produkziorako behar besteko abiadurarekin.

Orain, Covariant izeneko startup-a ilunpetik atera da eta Knapp-ekin batera garatutako lanaren berri eman du. Erraldoiak dagoeneko inplementatu ditu Covariant-en algoritmoak bere bezeroen bi biltegitan. Horietako bat (Alemaniako Obeta hornitzaile elektrikoak operatzen duena) produkzio-lanetan ari da joan den irailetik. Covariant-eko fundatzaileek diotenez, Covirant-ek laster itxiko du beste akordio bat robotika industrialaren arloko beste erraldoi batekin.

Albiste honek aldaketa bat eragingo du AAk gidatutako robotikaren arloan. Horrelako sistemak ingurune akademiko oso mugatuetan erabili izan dira orain arte. Baina Covariant-ek uste du bere sistema ongi egokitu daitekeela mundu errealaren konplexutasunera, eta prest dagoela biltegietan erabiltzen hasteko.

technologyreview.es