2016an 100 milioi bidaiari baino gehiago ibili ziren garraio publikoan 600.000 biztanleko herrialde txiki eta aberats honetan. Oro har, bidaien %17 egiten dira garraio publikoan, batez besteko hori Europakoaren antzekoa delarik Eurostat agentziaren arabera. Hala ere, Luxenburgo hirian trafiko-pilaketaren arazoa oso larria da, munduko larrienetako bat alegia.

Luxenburgo ezagun egin da ikuspegi aurrerakoia izateagatik mugikortasunaren arloan. The Guardian egunkariak jakinarazi duenez, 20 urtetik beherako guztiek dohainik dute garraio zerbitzua. Eta gainerako bidaiariek 2 eurotan dute bi orduz bidaiatzeko aukera ematen duen txartela. Kontuan izanik herrialdeak 2.590 km2 dituela, ia jomuga guztietara iristeko balio du horrek.

Garraio Ministerioak jakinarazi duenez, garraio publikoak 491 milioi euroko kostua du Luxenburgon eta txartel-salmenta nahiz harpidetzengatiko diru-sarrerak 40 milioi eurokoak dira urtean.

Baina, salmenta horiek lanpostuak ere sortzen dituzte. Horregatik, gobernuaren proiektuak kezka sortu du langileen artean, neurri horrek berekin ekarriko bailuke leihatilak ixtea.

lavanguardia.com