EBk duela aste batzuk ezagutarazi du adimen artifiziala Europan bultzatzeko egin duen plana. Horrekin batera, aditu talde batek adimen artifiziala (AA) garatzeko eta erabiltzeko zuzentarau etikoak biltzen dituen lehen zirriborroa egin du, eta abenduaren 18an argitaratu da agiri hori.

Zirriborro horretan hainbat aukera ematen dira adimen artifizialeko tresnen garatzaileek eta erabiltzaileek ziurtatu dezaten euren tresnek errespetatzen dituztela oinarrizko eskubideak, aplikatzekoa den araudia eta oinarrizko printzipioak eta, orobat, egiazta dezaten teknikoki sendoak eta fidagarriak direla.

“Gizakiok badugu kode etiko bat, ulertzen dugu zer dagoen ondo eta zer gaizki, eta lege sistema bat sortu dugu hori guztia babesteko. Antzeko kode bat eta arau-multzo bat behar da AArentzat ere” dio zirriborroak. Agiriak dio AAk bete egin behar dituela oinarrizko segurtasun arauak. Zentzu horretan, ezingo da erabili gizakiei inolako kalterik eragiteko; ezingo du gizakion askatasuna mugatu (“jendea ez da egongo AArekin funtzionatzen duten makinen menpe edo haien agindupean”); zuzentasunez erabiliko da, ez inor baztertzeko edo estigmatizatzeko; gardentasunez funtzionatu behar du (“ezinbestekoa da jakitea zertarako garatzen den AA, zein diren bere helburu espezifikoak eta nola erabiliko den”); eta AA garatzearen helburu bakarra izango da norbanako bakoitzaren eta gizarte osoaren ongizatea lortzea, baita munduko herrialde pobreenetan ere.

Hiritarrek eta ekosistema teknologikoak agiri horri buruzko iritziak eman ahal izango dituzte urtarrilaren 18ra arte. Horrekin batera, Europako AA Aliantzak hainbat eztabaida antolatu ditu teknologia honen paperari buruz. Aditu taldeak 2019ko martxoan aurkeztuko dizkio bere behin betiko zuzentarauak Batzordeari, hark aztertu ditzan eta proposamena gauzatzeko modua proposatu dezan.

computerworld.es