Ather enpresak, duela sei urte sortutako start-up batek, dagoeneko bildu ditu 62 milioi euro eta joan den udan hasi zen scooter motorren eskaera aurreratuak onartzen. Ather da ibilgailu elektrikoen (IE) industria gorakorra zabaltzea helburutzat hartu duen Indiako konpainia urrietako bat. Hori lortzeko, Indiako garraio-sistema bereziaren arabera diseinatutako produktuak eskaintzen ditu. Indiako errepideetan dabiltzan ibilgailuen ia %80 bi gurpildunak dira eta nahiko pertsona gutxik izaten dute euren jabetzako ibilgailu bat. Bizikleta, trena, autobusa eta rickshaw-a ere erabiltzen dituzte joan-etorrietarako eta bidaiak partekatzen dituzte.

NITI Aayog erakundeak (Gobernuaren ideia-laborategi bat) iaz eginiko txosten baten arabera, ibilgailu elektriko txiki eta publikoak ekoiztea da bide egokiena Indiak ahalik eta gehien murriztu ditzan isuriak, aireko kutsadura eta etengabe hazten ari den automozio-industriarekin lotutako petrolio-inportazioak. Txostenaren arabera, teknologia, estrategia eta politika egokiak baliatuz, posible izango da horrelako garraiobideak ekoitziko dituen industria nazional bat sortzea, zeina gai izango baita mundu mailan lehiatzeko autobus garbien hurrengo belaunaldia nahiz bi eta hiru gurpileko ibilgailuak ekoitziko dituzten enpresekin.

technologyreview.es