Hala, egoera sozial eta ekonomiko ahuletatik zetozen pertsonek aukera izan zuten, gizateriaren historian inoiz ez bezala, gizartean gora egiteko beren ideia onen indarra baliatuz.

Ideiak, ideia onak, baldintza berdinetan lehiatzen ziren. Edo baldintza-berdintasun handiagoan, behinik behin. Pobrea izanik ere, ideia on bat izanez gero, posible zen patente bat lortzea diru gehiegi gastatu gabe.

Gero, ideia hori beste pertsona edo enpresa bati sal zeniezaiokeen, dirua eta ospea lortuz. Thomas Edison aparta izan zen horretan: fonografoa eta bonbilla asmatu zituen eta bere izenean erregistratu zituen 1.093 patente Estatu Batuetan eta 1.500 mundu osoan.

Baina ideia gutxi edo bakarra izan, negozio bat sortzea zen harekin dirua egiteko modu onena. Eta horretarako kapitala behar zen. Orduan, beste baldintza onuragarri bat atxiki zitzaion patente-sistemari: bankuak prest zeuden dirua mailegatzeko, banka eta finantza arloko bitartekaritza izugarri azkar zabaldu zelako.