Konfirmatu da haziz doala hobekuntza-ekintza puntualen eta denboran zehar eta modu planifikatuan eginiko berrikuntzen kopurua.

• %60,3k dio berritzeko hartu duten erabakia arrakastatsua izan dela.
• %80,9k fakturazioa emendatu du eta %71,7k enplegua sortu du inplementatutako berrikuntzei esker.

BERRIKUNTZA - JARDUERA

Bizkaiko enpresen %60,7k onartu dute berrikuntza-jardueraren bat egin dutela 2017an. Etengabe berritzen duten enpresak kontuan hartuz gero, %38,8k berrikuntza jarduerak egin dituzte modu jarraituan 2017an eta aurreko hiru urteetan.

BIZKAIKO BERRIKUNTZAREN INDIZEA

Gainera, enpresetako berrikuntza jardueraren sistematizazio-gradua neurtzen duen Bizkaiko Berrikuntzaren Indizearen arabera, enpresen %37,2k berrikuntza-maila handia edo oso handia dute.

Bestalde, enpresen %60,3k uste dute berritzeko hartutako erabakia arrakastatsua izan dela. Hona hemen lortu dituzten emaitzak: kalitate hobea (%85,6), fakturazio handiagoa (%80,9), eta bezeroen premiei arinago erantzuteko gaitasuna (%78,4). Era berean, nabarmentzekoa da %71,7k enplegua sortu dutela inplementatutako berrikuntzei esker, eta portzentaje hori 6,8 puntu hazi da 2016koarekin alderatuta.

BERRIKUNTZA MOTAK

Inplementatutako berrikuntza-motei dagokienez, berrikuntza teknologikoen artean aipatzekoa da produkzio-prozesuen hobekuntza (%24) eta, aldiz, berrikuntza ez-teknologikoen artean (marketinekoak edo antolakuntzakoak) kudeaketa-praktika berri edo hobetuak (%14,8).

LANKIDETZA

Azterlanaren emaitzetan ikus daiteke orobat lankidetza elementu erabakigarria dela berritzeko erabakia hartzeko orduan. Enpresen %40,6k diote lankidetzan jardun dutela beste batzuekin, eta gero eta protagonismo handiagoa eman dietela merkatuko eskakizunei. Aipatzekoa da lankidetzan aritu diren enpresen %41,6k aurreikusitako helburuak lortu dituztela, eta %5,4k gainditu egin dituztela.

Bestalde, enpresen %42,1ek berrikuntza-prozesuak garatzen dituzte testuinguru ekonomikoa gorabehera, eta %49,7k ez dituzte berrikuntza arloko helburuak murriztu egoera ekonomikoagatik. Etorkizunera begira, Bizkaiko enpresa-sarearen aurreikuspenak baikorragoak dira aurreko urteetakoak baino.

BERRIKUNTZA-JARDUENARIK EGIN EZ DUTEN ENPRESAK

Beste muturrean daude azken urtean inolako berrikuntza-jarduerarik egin ez duten enpresak, %39,3 guztira. Enpresa talde horretako konpainia gehienek uste dute ez dela beharrezkoa ekimen berritzaileak egitea, batzuek ez dutelako premiarik ikusten, beste batzuek pentsatzen dutelako ez dagoela ondasun eta zerbitzu berritzaileen eskaerarik, eta besteek, aldiz, berrikuntzaren kostuagatik. Hala ere, gero eta argiago dago ekimen berritzaileak garatzea beharrezkoa eta presazkoa dela, eta lotura daukala enpresaren arrakastarekin. Hala, berritzen ez duten enpresen %64,8k diote nolabaiteko laguntzak (diru-laguntzak, orientazioa, zerbitzu teknologikoak, e.a.) beharko lituzketela egoera hori aldatzeko.