Xnowers exoeskeletoa Tokioko Good Design Awards sariketako finalistetako bat izan da. Lehiaketa horretan (diseinu arloko munduko sari-banaketa zaharrena eta ospetsuenetakoa) diseinuaren bidez gizartea aberasten duten produktuak saritzen dira.

Gailu berria -Levier enpresako diseinatzaile Galder Fernándezek garatu du azken urte eta erdian, hainbat teknologi zentrotako ingeniariekin lankidetzan- oso azkar eta erraz akoplatzen zaie kirolarien botei eta zangoei. Exoeskeletoak errendimendua hobetzen du, indarra hobeto transmititzen delako eta giharretako nekea arintzen delako, eta belaunak (oso ohikoak halako kiroletan) edo bizkarraldea lesionatzeko arriskua gutxitzen du. Era berean, giharrak gutxiago nekatzen direnez, denbora gehiagoz egin daiteke kirola.

Xnowers-en helburua da kirolariaren gaitasunak hobetzea kanpoko elementuak kontrolatu behar dituenean eta gorputz-jarrera zehatz batean egon behar duenean, hots, bere zamari eutsiz koadrizepsak eta bizkarraldeko giharrak behartzen dituen bitartean. Hori gertatzen da taulak, eskiak edo motorrak erabiltzean.

Hala, patentatutako exoeskeletoari esker (oso arina eta ergonomikoa da) 30 kiloraino gutxitu daiteke koadrizepsek eta belaunek jasan behar duten zama. Era berean, gorputz-jarrera zuzentzen eta zuzen mantentzen laguntzen du, kanpoko presio horren zati handiena desagertzen delako eta, hain zuzen, horixe da eski eta snowboard bezalako kirolen saioak luzatzea eragozten diguna. Hortaz, sistema honek kirolarien segurtasuna hobetzen du, belaunetan eragiten den presioa murrizten delako.

levier.eu