2026ko Norabidea azterlanaren arabera, Bizkaiko enpresen berrikuntza sendotzeko fasean sartu da, eta honako hauxe dauka ezaugarri bereizgarri: baliabideen helburu zehatzagoak, orientazio estrategikoagoa eta emaitza ukigarrien bilaketa handiagoa.

2025ean, Bizkaiko enpresen %39,9k jarduera berritzaileak garatu zituzten. 2024an lortutako gehienekoaren ostean, jarduera berritzailea aurreko urteetan behatutakoen antzeko mailetan egonkortu da. Enpresen erdiek baino gehiagok (%52,7) uneren batean berritu dute azken lau urteotan, eta %27,3ren jarduera berritzailea iraunkorra izan da.

Helburu zehatzagoa daukan berrikuntza

Txostenaren ondorio nagusietakoa berrikuntza kudeatzeko moduaren aldaketa izan da. Enpresek ekimenen barreiaketa murriztu dutenez, balioa zein itzulketa sortzeko gaitasun handiagoa duten proiektu estrategikoetarantz bideratu dituzte euren baliabideak.

Gero eta erakunde gehiagoren ahaleginek proiektu berritzaile bakarra izan dute helburu, eta aldi berean hainbat ekimen garatzen dituzten profilen kopuruak behera egin du, ordea.

Prozesuen berrikuntza liderra da oraindik

Oraindik ere, prozesuen berrikuntza da Bizkaiko enpresen artean hedatuen dagoen modalitatea, erakundeen %29,7k ezartzen dute-eta. Ondoren, produktuen edo zerbitzuen berrikuntza dago, %24,1ekoa da-eta.

Azterlanean ere adierazten denez, berrikuntza bideratuago dago merkatuaren eta bezeroen premietarantz. Hori dela eta, enpresen lehiakortasunerako tresna moduan daukan zeregina indartu da.

Berrikuntza enpresen estrategian hartzen da kontuan

Enpresen euren helburu estrategikoak berrikuntzaren sustatzaile nagusia dira. Erakundeen %64,9k berritu egiten dute, berrikuntza bera haien hazkuntzaren zein garapenaren arloko estrategiaren funtsezko osagaia dela uste dutelako.

Bilakaera horren arabera, agerikoa da kanpoko faktoreek bultzatutako berrikuntzatik igaro direla enpresen kudeaketan nahiz plangintzan integratuago dagoen berrikuntzarantz.

Emaitzak sorrarazten dituen inbertsioa

Oraindik ere, berrikuntzak eragin on handia dauka garatzen duten enpresetan.

Erakunde berritzaileen %94,8k euren proiektuetan emaitza onak izan dituztela baieztatu dute, eta, %66,8k adierazi dutenez, eragin onak eduki ditu zenbait adierazle ekonomikotan; esate baterako, fakturazioa, marjinak edo mozkinak.

Horrez gain, %72,9ren esanetan, hasierako aurreikuspenak bete edo gainditu dituzte.

Bizkaiko Berrikuntza Indizea

Berrikuntza Indizearen arabera, enpresen %28,4ren berrikuntza-maila handia edo oso handia da. Erakunde berritzaileen artean, hamarretatik ia-ia seiren (%59,8) maila aurreratua denez, argi eta garbi dago lotura estua dagoela berrikuntzaren, sistematizazioaren eta antolakuntza-gaitasunen artean.

Aldi berean, bere horretan diraute berrikuntza egitura moduan integratu duten enpresen eta oraindik ere jarduera-berritzaile urria garatzen duten enpresen arteko aldeek.

Erronkak eta aurreikuspenak

Txostenak berretsi egin du oraindik ere antolakuntza-gaitasun, esportazio-jarduera eta beste erakunde batzuekiko lankidetza handiagoa daukatenak direla gehien berritzen duten enpresak.

Hurrengo urteei begira, enpresa-sare osoan eta, batez ere, enpresa txiki zein ertainen artean egonkorragoak, egituratuagoak eta jasangarriagoak diren ereduak hedatzea izango da erronka nagusia.

Aurreikuspenak onak dira: enpresen %70ek baino gehiagok aurreikusitakoaren arabera, euren gaur egungo berrikuntza-mailei eutsiko diete, eta %3k baino gutxiagok murriztu egingo dituztela adierazi dute.